فئة المناقشات العامة

موضوع: ◄ مين ابتدى؟ ►

يزرع رياح الجرح جوّه الأوردة ،
ويبل ريق الدم موت
ويشعل الخوف فـ العروق
لحظة خضوع شمس المشاعر للشروق
جوه أكوان التلاقى
لسّه باقى
نبض رافض يقتحم خِلوة وداعنا
لسّه أفكارِك بتقتل فـ القصايد كل معنى
لسّه مضمونك بينكر إنّه أب لدنداناتى
وإنّ أفكارى البريئة كات بتحمل من سفاح
وإنّك إتعودتى تاخدى شهوتك منى إرتياح
لـ إجتياح غدرك لطُهرى فـ الغرام ،
كنت أول مرة أنطق بالكلام
كات حروف إسم علاقتنا ،
كنت بتهجى العلاقة اللى ما بينّا
من بداية لهفة النظرات فـ عينّا
قصدى عينى
كنت مؤمن إنّى أكمل نص دينى
لمّا ألملم ضحكتك ع الدبلتين
وإنّى لمّا أدعى لهوانا بـاستقامة
أسمع الإحساس فـ روحك ينتفض ويقول أمين ،
كنت شاعر
والقصايد كلها متصاغة ليكى
كنت بلمس فـ الحروف لمسة إيديكى
كنت بقراكى فـ كفوف كل البنات
كل ما اقراكى ارتجل
سحر سكران من ملامحك
اكتشفت إنّ انتى "سيدة الدجل "
وإنّك انتى سحرتى قلبى لـعشق جرحك
اكتشفت
إنّى كنت جنين مشوّه.. وانتى ملجأ اختناقى
وإنّ كوبليه السعادة المقتبس من حبى ليكى
بره أغنية هواكى
وإنّ دندنة الجوارح سنيوهات الابتسام
كات نشاز
وإنّ عشقى فِعل فاضح
والطريق لـهواكى عام
والمشاعر لوح إزاز.

توقيع العضو : Qhr