فئة المناقشات العامة

:-تم انشاء الموضوع الموافق
08.07.2013
19:37:17

:- ◄ كفاية سياسة.. ابدأ بنفسك وغير مصر ►

◄ كفاية سياسة.. ابدأ بنفسك وغير مصر ► Star-110

:- صورة أرشيفية
******************************
أنا شايفة طالما إحنا وصلنا لغايتنا أو على الأقل جزء كبير منها وأتمنى أن نكون على حق.. كفاية سياسة بقى فعلا كفاية... عمرنا ما فهمناها ولا هانفهمها بجد.. مش إحنا اللى فهمناها فى سنتين إللى هانقعد نهرى ونتكلم فيها.. اتكلمنا..اتجادلنا..ضحكنا..نصحنا..غلطنا..فهمنا..رسالتنا وصلت.. حتى لو كان البعض تلاعب بيها... فلكل ناجح أعداء... وعدم تقبل الهزيمة دليل على ضعف موقف الطرف الآخر وأنهم من غير مبادىء.... الحق سينتصر دائماً بإذن الله وسيتحدث عن نفسه حتى وسط الصمت...دورنا إلى حد ما انتهى فى السياسة.. دورنا دلوقت بقى نرجع مواطنين.. نرجع نبنى مصر.. غيّر فى نفسك.. غيّر فى إللى حواليك..ابدأ صفحة جديدة مع نفسك زى ما أنت عايز مصر تبدأ صفحة جديدة معاك.. انضف من جواك..كن من الكاظمين الغيظ والعافين عن الناس..وابدأ ساعد إللى حواليك.. غير إللى حواليك..ابدأ بنفسك.. وكن أنت قائدا لأى تغيير فى مصر مهما حسيته صغيّر..أى مشروع ولو من شخص أو اتنين..مشوار الألف ميل يبدأ بخطوة.. لازم نساعد بعض شوف مين الناس إللى مظلومة فى مصر ولازم نوصلها إزاى صوت الحق لما بان مش بس من سنة لاء من ساعة ما مبارك مسك الحكم كمان كل حاجة هاتتغير ان شاء الله ولازم يوصلهم التغيير إللى مش قادرين يشوفوه ويحسوه بنفسهم..اليتامى اللى اهملناهم...ولا ولاد الشوارع إللى بيكبروا وبنسميهم بلطجية وحرامية.. ولا المرضى فى المستشفيات إللى ما حدش بيزورهم ويرفع معنوياتهم ولا مين ولا مين ولا مين.. دورنا دلوقت أهم..إحنا توكلنا على الله وساعدنا ع التغيير..لكن التواكل مش ها ينفع فى المرحلة الجاية.. مصر مش ها تتغير لوحدها.

ابسط حاجة.. احفظ بلدك من الفتن.. ده أصغر مشروع ممكن نبدأ بيه.. تعال على نفسك شوية وما تعملش شير لأى حاجة حتى لو عايز توصّل رسالة لمؤيدى "الشرعية".. هم خلاص مقتنعين بإللى بيقولوه فبلاش تحرق دمك ع الفاضى.. قابل الإساءة بالإحسان..إحنا هانكتفِ بالصمت...ولو صوتهم فعلاً له صوت ها يوصل زى ما صوتنا صوت الحق... وصل لكل الناس فى العالم.
لك الله يا مصر... وأنتم لمصر يا مصريين.

◄ كفاية سياسة.. ابدأ بنفسك وغير مصر ► Icon410