كل سنة نعمل ثورة جديدة .. وناس تروح ضحايا وأرواح تموت من غير ذنب .. أطفال وشباب وبنات .. يموتوا باسم الحرية وتحقيق العدالة والكرامة والإنسانية .. وفي الآخر .. في الآخر إيه اللي بيحصل .. بيعملوا انتخابات بيقولوا عليها إنها انتخابات نزيهة .. وطبعا أشك في ذلك .. وفي الآخر يجي رئيس بدل ما يصلح البلد يبوظ البلد بزيادة .. حسب معتقداته وأفكاره وسياسته اللي تربى عليها .. سواء معتقدات دينية أو فكرية أو سياسية .. والمصيبة إن مش هي دي المشكلة .. المشكلة الأكبر في الشعب .. اللي عمال بيعمل ثورة .. عشان يغير الحكومة .. وفعلا بيغيرها .. والنتيجة هي هي .. وبينسوا تماما إن هما فيهم عيوب الدنيا .. أخلاق فاسدة .. وسلوكيات خاطئة .. طبعًأ مش بعمم .. لأني برفض مبدأ التعميم .. عشان لو عممت على الشعب المصري كله هبقى بظلم جزء كبير منه عشان زي ما في ناس وحشة في برده ناس كويسة .. طب ياعم انت وهو وانتي وهي .. غيروا من نفسكم الأول .. غيروا أخلاقكم وتصرفاتكم وسلوكياتكم .. ابسطها لما تيجي تأكل حاجة مترميش الورقة في الشارع .. وانت يا حضرة الشاب ياللي بتدخن .. وبترمي السيجارة في الأرض وهي مولعة وممكن تمسك في أي حاجة وتولع فيها .. انت مش عارف إن شرب السجاير ده حرام .. وانت ياللي عمال بتعاكس في بنات الناس .. وتتكلم مع اللي رايحة واللي جاية ومافيش حياء ولا أدب ولا احترام .. ولا حتى مراعاة لربنا .. مش عارفة أقول ايه بجد .. سايبين كل ده وياما في حاجات كتير ومصايب أكبر وماسكين في الرئيس .. بتقولوا مافيش شغل .. لا دوروا في شغل .. امسكوا في أي حاجة واشتغلوا .. اللي عايز حاجة بيوصلها .. واللي بيدور ربنا بيعينه .. أصل مافيش حاجة هتيجي لحد عندك .. في أماكن وشركات خاصة كتير .. اه معاك الحكومة مافيهاش أماكن .. بس أرض الله واسعة ورزقك مش مع الرئيس ولا الحكومة رزقك عند ربنا .. عشان الله هو الرزاق ذو القوة المتين .. لو توكلت على الله .. ربنا عمره ما هيسيبك .. يعني ابدأ غير من نفسك .. كفاية بقى نظام الشعارات .. كفاية نظام رفع الكلام .. كفاية نظام الأقوال من غير الأفعال .. مش هتفيد .. اعمل بقى .. اتحرك بقى .. كفاية كلام .. كفاية تضييع وقت .. كفاية مظاهرات .. مش هتيجي بفايدة خلاص .. مش هتعمل حاجة تاني .. كل اللي هيحصل دم ناس هتروح هدر مالهاش اي ذنب .. وناس تانية هتيجي عشان تاخد حقها .. وسلسلة من المظاهرات وناس تموت .. طيب مش ده يبقى حرام .. ياجماعة .. في معلومة مهمة صلاح المجتمع بيبدأ من صلاح الفرد .. لو كل فرد فينا غير من نفسه للأحسن المجتمع كله هيبقى كويس ساعتها بجد لما نتكاتف ونبقى ايد واحد ربنا هيرضى عنا .. وهيجيلنا رئيس يحكمنا بس بإرادة الشعب الحرة ولكن تبقى حرية مقننة فيها احترام للحكومة وبالتالي الحكومة تحترمنا.
تبقى دولة مدنية ديمقراطية مسالمة إسلامية. مش إسلامية من غير سلام ..

---

---